الماتى قالاسىنىڭ اكىمى ب. ساعىنتايەۆ «استانا» حالىقارالىق قارجى ورتالىعى ۇيىمداستىرعان قارجى فورۋمىنا قاتىستى. قالا باسشىسى مەگاپوليستى دامىتۋعا ينۆەستيسيا تارتۋدىڭ نەگىزگى باعىتتارى تۋرالى ايتتى، دەپ جازادى اكىمدىكتىڭ باسپا ءسوز قىزمەتى.

باقىتجان ساعىنتايەۆ ءوزىنىڭ قۇتتىقتاۋ سوزىندە الماتىدا قازاقستاننىڭ سالىق تولەيتىن ءىرى كومپانيالارىنىڭ ۇشتەن ءبىرىنىڭ، 30-دان استام ترانسۇلتتىق كومپانيالاردىڭ، بانكتەردىڭ باس وفيستەرىنىڭ 86%-نىڭ، بىرىككەن كاسىپورىندار مەن ءىرى حالىقارالىق ۇيىمداردىڭ 43%-نىڭ ورنالاسقانىن اتاپ ءوتتى. الماتى – ەكونوميكاسى 36 ميلليارد دوللاردى قۇرايتىن ورتا ازياداعى ەڭ دامىعان مەگاپوليس.

«ءبىز الدىمىزعا جاھاندىق قالا بولۋدىڭ جانە ءومىر ءسۇرۋ ساپاسى ءارى ەكونوميكالىق مۇمكىندىكتەرى جاعىنان 100 مەگاپوليستەر قاتارىنا ەنۋ بويىنشا ۇزاق مەرزىمدى مىندەتتى قويۋدامىز. الماتى – حالقى قالا ماڭىنداعىلاردى قوسا ەسەپتەگەندە ءقازىردىڭ وزىندە ءۇش ميلليونعا جاقىنداپ قالدى، ال 2030 جىلعا قاراي بەس ميلليونعا جەتۋى مۇمكىن»، – دەدى ب.ساعىنتايەۆ.

ول شەت ايماقتاردى قالا ستاندارتتارىنا ساي دامىتۋ جونىندەگى «جاڭا الماتى» اتتى ءۇش جىلدىق جوسپاردى جۇزەگە اسىرۋ ءۇشىن 800 ملرد. تەڭگەگە جۋىق بيۋدجەت قارجىسى مەن جەكە ينۆەستيسيا قاجەت ەكەنىن، سول ارقىلى قالا باستامالارىنىڭ ورىندالۋىن جانە الماتىلىقتاردىڭ تۇرمىس جاعدايلارىن جاسقارتۋدى قامتاماسىز ەتەتىن سالىق ءتۇسىمىن ارتتىرۋعا بولاتىنىن ايتتى.

بۇدان وزگە، الماتى اكىمدىگى «استانا» حالىقارالىق قارجى ورتالىعىندا قىزمەتىن جۇرگىزەتىن ينۆەستيسيالىق قورمەن ىنتىماقتاستىقتى قالىپتاستىرۋدى جوسپارلاۋدا. ب.ساعىنتايەۆ ۇكىمەتپەن بىرگە بيزنەس جۇرگىزۋدە اكىمشىلىك كەدەرگىلەردى ازايتۋ، تىركەۋ پروسەدۋرالارىن جەڭىلدەتۋ بويىنشا شارالار پاكەتىنىڭ قولعا الىنعانىن اتاپ ءوتتى.

«الماتىدا مەمبيۋدجەت ەسەبىنەن يندۋستريالدى ايماقتا بىرەگەي ينفراقۇرىلىم قالىپتاستى. سونىمەن قاتار «يننوۆاسيالىق تەحنولوگيالار پاركى» اەا سالىق تولەۋ جانە باسقالارى بويىنشا جەڭىلدىكتەر قاراستىرىلعان»، – دەدى قالا اكىمى.

ايتا كەتەرلىگى، مەگاپوليستە بيزنەستى قولداۋدىڭ ءبىرقاتار كونسالتينگتىك جانە قارجىلىق شارالارى جۇزەگە اسۋدا. مىسالى، Qoldaý كاسىپكەرلىكتى قولداۋ ورتالىعى بيزنەسكە ءبىر تەرەزە قاعيداسى بويىنشا مەمقىزمەتتەر جانە تەگىن كونسالتينگتىك قىزمەتتەر كورسەتەدى. «Almaty Finance» كومپانياسى مەن «Almaty» ميكروقارجىلىق ۇيىم شاعىن جانە ورتا بيزنەستى قولداۋ ءۇشىن 2%-دان 7%-عا دەيىن جەڭىلدەتىلگەن نەسيەلەر بەرەدى.

«جالپى ءبىز كەلەر جىلدان باستاپ شوب قارجىلىق قولداۋ كولەمىن ءۇش ەسە ۇلعايتۋدى جوسپارلاۋدامىز. اعىمداعى جىلى 11،5 ميلليارد تەڭگەدەن 30 ميلليارد تەڭگەگە دەيىن كوبەيتەمىز. ودان ءارى ءبىز شەشىم قابىلداۋ ءۇشىن ساراپتاما بازاسىنا سۇيەنە وتىرىپ، ونىڭ ىشىندە اكىمدىكتىڭ سيتۋاسيالىق ورتالىعى جانە Big Data نەگىزىندە قولداۋ شارالارىنا تۇزەتۋ ەنگىزەتىن بولامىز»، – دەپ اتاپ ءوتتى مەگاپوليس باسشىسى.

ول ءوزىنىڭ سوزىندە الەۋەتتى ينۆەستورلار ءۇشىن تاۋارلاردى وڭدەۋ جانە قايتا وڭدەۋ، كولىك-لوگيستيكا قىزمەتى، تۋريزم سالالارىنىڭ پەرسپەكتيۆالى باعىتتارى ەكەنىن اتاپ ءوتتى. وسىناۋ ومىرشەڭ سالالاردا جاڭا ءوندىرىس اشۋعا زور ىقپال ەتەتىن كرەاتيۆتى ەكونوميكاعا ەرەكشە نازار اۋدارعان ءجون.

قازاقستاندىق قارجى فورۋمى – تۇتىنۋشىلار قۇقىعىن قورعاۋ، احقو-نىڭ بيزنەس ءۇشىن مۇمكىندىكتەر ماسەلەلەرىن تالقىلايتىن الاڭ. فورۋمنىڭ ماقساتى – احقو-دا جۇرگىزىلەتىن ينۆەستيسيا تارتۋدىڭ نەگىزدەرى جانە بيزنەس جۇرگىزۋدىڭ شارتتارى تۋرالى حاباردار ەتۋ، سونىمەن قاتار قارجى قىزمەتىندە تۇتىنۋشىلاردى قورعاۋ. القالى شارادا احقو ساراپشىلارى سپيكەر رەتىندە قارجى قىزمەتىن، قارجى تەحنولوگياسىن، جاسىل جانە يسلام وبليگاسياسىن شىعارۋدى رەتتەۋ، باعالى قاعازدار نارىعىن ينۆەستيسيالاۋ، سونىمەن قاتار ۇزدىكسىز كاسىبي دامۋ تۋرالى تەرەڭ ماعلۇمات الا الدى.